Act 11 | GAM | STEP | Epil djell una God kandjiye pille i mal ge una kandjambe tomaka, aposel kambono ne, Jisas pillgi dji una distrik Judia moi ge aike pi.

Acts 11

Wal kane yei mal ge Pita Jerusalem po una dje awi

1 Epil djell una God kandjiye pille i mal ge una kandjambe tomaka, aposel kambono ne, Jisas pillgi dji una distrik Judia moi ge aike pi. 2 Pillmaka Pita Jerusalem pi ba, Juda pillgi pai una wo kandja awo embe dji, 3 epil djell una gaklene kelip natonj ba ni numog po ga boll kwa non ge kune nayendo we dji.

4 Djimaka Pita wal porapora kaima yei mal ge kandjambe to embe dji, 5 na dumo Jopa kamang ye molo, nalena al kanill. Besit kerman mal embe kupill al paika, ulle 4-pela pai al una amblo kal makimb al wormaka wo na moll al pai. 6 Paika na kane pakna woro kanill, nomaga ne med dowa ka ne wal sibill porapora pakna moi. 7 Moika una numbke ta na moll al embe dji, Pita, ni aglo molo, wal moi ge to namben we dji. 8 Dji ba, na kandja embe djill, Iwa Kerman, man we! Na asa molo woll mal ge, wal mapill wal ne, wal ni man djin wal moi ge na kaima nanoll we djill. 9 Djillka una numbke kandja alla dje embe dji, wal moro ge God dji wopake moro. Ni wal moro ge kune nayendo we nadjimben we dji. 10 Na nalena al kanill ge kune sokara kanillka, wal besit ge alla i er pla kupill al pi.

11 Er pika na numb moll al kune taimane iwa sokara wo kond dillake al aglo moi. Una woi ge dumo Sisaria iwa ta dje worika wo na pille dulo woi. 12 God Murble moro ge une na moll al embe dji, ni kamalen ngujo napupen. Kambono boll aike ben ge kune yendo we dji. Djika na una sokara ge yemaka, agana 6-pela manda moi ge boll aike er wo iwa ge numbye al pupin. 13 Po mopinka iwa Kornilius ge kandjambe to embe dji, na numb al molo kanill, tau agelo ta wo embe dji, ni kandja sigye dje worbenka una dumo Jopa po iwa Saimon kandjiye ta Pita we dji ge po dje iwne! 14 God ni gaman womban boll i yem woro natonda mal ge Pita wo kandja ge dje pene worda ye piye we dje tau agelo embe dji. 15 Na po kandja kindja dje mollka, God Murble asa no mopin al woi mal ge, une embe molo woika ga nomane al puka toi. 16 Wo moi ge, asa Iwa Kerman Jisas kandja dje nono awi mal ge na pill. Une kandja embe dji, Jon ye nu kiwa pagle awi ba, God yene Murble ye boll pagle aunda we dji. 17 Asa nono Iwa Kerman Jisas boll pillgi djipinka, God yene Murble nono wal gorwulle mal ye awi ge, une ipon epil djell una moi al aike ye awi. Une embe yei ge yene nomane pai mal pille yei, na po man djino ge kune kaima nayendo we dji.

18 Pita kandja embe dje pora djika, ga kandja ta napai, God kandjiye amblo pla woro embe dji, God no awi mal embe une para epil djell una awika, ga singare ke kere, nomane gun imbon we dji ge, God pora we dji.

Dumo Antiok una Jisas boll pillgi dji

19 Asa una Stipen to golo, po una pillgi dji una moi al ye ke ye aumaka, pillgi pai una seke er dumo djelldjell pi. Pende distrik Ponisia pumaka, pende er Saiprus pumaka, pende er Antiok pi. Po God kandjiye dje Juda una moi al awi, epil djell una moi al dje nawi. 20 Dje nawi ba ga pende dumo Saiprus ne, dumo Sairini una alla dumo Antiok po Iwa Kerman Jisas kandjiyembe wopake to epil djell Grik una para awi. 21 Dje aumaka God yembe dongall awika una merkeke nomane ake to, Iwa Kerman boll pillgi dji.

22 Dumo Antiok una pillgi dji we djimaka, pillgi dji una Jerusalem moi ge pille, Barnabas dje wormaka une er Antiok pi. 23 Po molo, God ye wopake ye awi mal ge pene paika, une kane wo pille embe dji, ye Iwa Kerman Jisas kandjiye al pillgi djinj ge, nakerne! Ye pillgi dje pa molme! dji. 24 Barnabas ge une iwa wopake moi. God Murble ge une boll moika, une pillgi dongall pai. Une embe yei al ge, una merke er pakna wo Iwa Kerman boll pillgi dji.

25 Are Barnabas iwa Sol pille dulo er dumo Tarsus pi. 26 Po Sol dje ika, soka er Antiok wopill. Soka pillgi dji una merke moi al God kandjiye beke awo mopillka kognumb taimanta er wo pi. Alla pillgi dji una kandjine Kristen we dje yei ge, dumo Antiok asamoll yei.

27 Kune ge una propet pende Jerusalem kere er Antiok woi. 28 Wo moi ge iwa taimanta kandjiye Agabus we dji ge God Murble une boll moika, une aglo molo embe dji, dumo yemyem yero ge kam koll kerman yenda, kwa ta napanda we dji. Une kandja embe dji ge kaima pai. (Iwa Sisa Klodius iwa kerman king moi poke ge kam koll embe yei.) 29 Kwa napaika, Jisas pillgi dji una dumo Antiok moi ge yenekne aune mal ge pille embe dji, nono agane dumo Judia mor ge wal naparo, nono wal aumbon we dji. 30 Dje iwo Barnabas ne, Sol aumaka, soka i er dumo Judia po, pillgi dji una kantau yenj una moi al aupill.